Manîfestasyona Yekitiya Ciwanên Lîberal ên swêdî li dijî terorê û
ji bo piştgiriya Kurdistana başûr pêk hat

STOKHOLM-12 Gulan/2005-Yekitiya Ciwanên Liberal ên Swêdî li hember qetliama 4ê gulanê ya li Hewlêrê û terorê, roja pênşema 12ê gulanê, li Stokholmê manîfestasyonek li dar xistin. Kurdên Stokholmê jî bi beşdarîya xwe piştgirî dan wan.

Ev cara yekemîn bû ku rêxistineke swêdî bi xwe ji bo piştgiriya kurdan insiyatfa çalakiyekê hilda destê xwe. Manîfestasyona Yekitiya Ciwanên Lîberal, bi gotarên siyasî, muzîk û staranen kurdî, û xwendina helbestan derbas bû. Li meydanê 46 mûmên mezin ku hejmara şehîdên 4-ê Gulanê li Hewlêrê sembolîze dikir hatibûn vêxistin. Seroka Federasyona Komeleyên Kurdistanê Şermîn Bozarslanê, nûnerê Hukumeta Herêma Kurdistanê li Iskandinavya Taha Berwarî, Berpirsê Komîteya HEVKARÎ li Swêd Şefîk Kaya, nûnerê Insîyatifa Kurdên Swêdê Kovan Amedî, û ji Yekitiya Ciwanên Liberal Fredrik û Gulan Avcî gotar xwendin.

Serokê Yekitiya Ciwanên Liberal ên Swêdî Fredrîk Malm, di gotara xwe da giranî da ser pêwistiya goherandina rejimên despot û zordest li navçeya ku kurd lê dijîn. Wî raya xwe di heqê vê yekê de weha anî zimên: "Hêzên çavsor û xwînrij ji azadiya gelê kurd re tehamul nakin," got, "lê bivê nevê ew ê qebûl bikin ku jiyaneke azad û mirovî mafê herkesi ye, û zû yan dereng wê her pêk bê. Çawa ez wek swêdiyekî li Stokholmê jiyaneke azad û bi aşitî ji xwe re wek mafekî sirûştî dibînin, wisa jî ji bo her kurdekî Silamêniyê, Mehabadê, Diyarbekirê û Qamîşlo jî dibînim."

Fredrîk Malm, dema li ser rewşa Kurdistana bakûr qise kir, got: "Me bihîst ku dewleta tirk li dijî siyasetmedarên kurd ên di HAK-PARê de doza cezakirinê dike ji ber ku kurdî qisekirine. Ew çawa bawer dikin ku bi vî hişî, ew ê bibin endamê YE ? Bi zimanê diya xwe xeberdan mafekî herî rewa ye. Divê em li dijî vê neheqiyê derkevin û em ê derkevin, heta ku kurd jî gihîştin azadî û wekheviyê". Fredrîk Malm axaftina xwe bi gotina "Bijî kurd, bijî Kurdistan" qedand. (Di wêneyê herî jorê de Fredrik Malm qise dike)