Di roja 21/1/2007`an de Komela Karkerên Kurdistanê li Swedê Komkar- Swêd, li Stockholmê 30 salîya xwe bi şevahengek kulturî pîroz kir. Şev bi axaftina serokê Komkar-Swêdê Kovan Amedî ve ve bû. Dû re pîroznameya nûnerê Hukumeta Herema Kurdistanê li bakurê Ewrûpayê hat xwedin. Her usa nûnerê Partîya Demokrata Kurdistanê PDK-Komîteya Swêdê Omer Soran, Nûnerê Yekitîya Niştîmanê Kurdistanê YNK- Komîteya Swêdê, Nûnerê  Partîya Demokrata Kurdistanê PDK-Bakur Komîteya Swêdê, Seroka Federasyona Komeleyên Kurdistanê li Swêdê Şermîn Bozarslan, Seroka Yekitîya Jinên Kurdistanê li Swêdê Seyran Duran jî di şevê de axaftinek pêşkeşkirin. Hemûyan jî di axaftinên xwe de, girîngî û hêjayîya kar û xebatên Komkar-Swêdê anîn ziman.

Sîyasetmedar û nivîskar Yilmaz Çamlibel jî beşdarîya şevê bû û di şevê de axaftinek kir. Çamlibel di axaftina xwe de li ser kar û xebatên Komkarê û bi giştî jî li ser girînîya kar û xebatên rêxistin û komeleyên demokratîk sekinî.

Sekreterê berê ya PSKê rêzdar Kemal Burkay bi beşdarîya şevê piştgirîya xwe nîşanê Komkar- Swêdê da. Serokê Partîya Çep ya Swêdê Lars Ohly, PSK-Komîteya Swêd, Hizba Şûî ya Kurdistana-Irak Komîteya Swêd, Partîya Yekitîya Kurd li Surîyê – Rêxistina Swêdê, Yekitiya Komeleyên Kurdistanê li Elmanya KOMKAR, Komeleya Gulan li Stokholmê, Komeleya Kurd li Spongayê, Komkar Danmark, Komkar Swîsre, Komkar Holanda, Komkar Fransa, Komkar Ingiltere, Komkar Awustûrya, Komkar Yunanîstan û Belçîkayê, pîroznameyên piştgirîyê ji bo 30 e mîn salvergera Komkar- Swêdê şandin.

Hin nivîskar û dostên Komkarê yên wek; Osman Aytar, Mûrad Ciwan, Îhsan Şener û Çetîn Taşçi jî 30 e mîn salvergera Komkar- Swêdê pîroz kirin.

Şev bi xwarin û vexwarin bû. Di warê kulturî de jî şev gellekî dewlemend bû. Dengbêjê me yê ciwan û deng xweş Narîn, hozanên me yên hêja Beyto Can û Cûdî, bi deng  avazên xwe yên xweş, bi klamên ji hev û din xweştir yên gelêrî, şoreşgerî û evîniyê, coşek mezin dan şevahenga Komkar-Swêdê. 

Şevageng heta 12`ê şevê bi coş û kêfek xweş dom kir. Di dawîya şevê de serokê Komkar-Swêdê Kovan Amedî, spasîya hemû partî û rêxistinên beşdar kir û her usa sipasîya Komkarê ji bo alîkarî û piştgirîya dengbêjên şevê, li Narîn, Beyto Can û li Cûdî kir.

..................................................

Ji bo pîrozkirina 30e mîn salvegera Komkar-Swêdê
Axaftina Serokê Komkar Swêdê Kovan Amedî

Nûnerên hêja yên partî û rêxistinên Kurdistanê, mêvanên xoşevîst, li ser navê Komkar- Swêdê bi xêrhatinek germ li we dikim û hun hemû bi xêr hatin şeva pîrozkirina 30 e mîn salvegera Komkar-Swêdê.

Li Swêdê, di warê karên rêxistînî de xwendevanên kurd, yekem rêxistina xwe ya demokratîk di 1ê meha 8`an ya sala 1970`ê de bi navê Komelaya Xwendevanên Kurd li Ewrûpayê KSSE yê damezrandin. Piştî têkçûyîna şareşa îlonê sala 1975`an KSSE bû sê perçe û rêxistinên wek Yekitîya Xwendevanên Kurdistanê AKSA û Yekitîya Ciwanên Xwendevanên Kurdistanê YUKSE hatin damezrandin. AKSA, KSSE û YUKSE  rêxistinên mişterek bûn, yanî kurdên hemû beşên Kurdistanê tê de hebûn. Kurdên ku wê demê hatibûn Swêdê piranîya wan jî xwendevan bûn.

Lê, li ser vê perçebûnê de pir neçû, di sala 1976`an de hin endamên AKSA`yê û YUKSE´yê jî ji wan veqetîyan û Komeleya Karkerên Kurdistanê li Swêdê, ango komeleya me ya îro KOMKAR-SWÊDê  damezrandin. Di wê demê de Gelek kurdên bakurê Kurdistanê, ji KSSE û YUKSE yê veqetîyan û di nav refên Komeleya Karkerên Kurdistanê de cîh girtin. Komelê di sala 1979àn de navê Komkarê jî li ser xwe zêde kir.

Bi piştgirîya çar partîyên siyasî, bi beşdarbûna 6 komeleyên demokratîk ku Komkar jî di nav wan de bû, di meha gulan a sala 1981-an da  Federasyona Komeleyên Kurdistanê Li Swêdê   avakirin. Ango di avakirina Federasyona Komeleyên Kurdistanê Li Swêdê de, Komkarê rolekî berbiçav lîstiye. 

Belê, îro Komeleya Karkerên Kurdistanê Komkar- Swêd. 30 salîya xwe bi we re pîroz dike.   30 sal umur di karê komelayetiyê de ne hindik e û ev yeka di jiyana kurdên Swêde de cîhekî girîn digrê.

KOMKAR-Swêd,  Qîmetek mezin daye xebatên ser ziman û çanda kurdî. Loma jî ji sala 1978-an heta niha kovarek bi navê ROJA NÛ 108 hejmar derxist. Nu ha jî wek malpera Roja Nû karê xwe didomîne. Komelê di sala 1980`an da weşanxaneya Roja Nû vekir û dest bi çapkirina pirtûkên kurdî kir. Pirtûkên gellek nivîskar û şaîrên kurd yên bi nav û deng wek; Ehmedê Xanî, Ereb Şemo, Hecîyê Cindî, Cegerxwîn, Kemal Burkay, Qanatê Kurdo, Lazeref, Eskerê Boyik û gellekên din hatîye çapkirin. Heta niha nêzîkî 65 kitêbên kurdî, dîwan, roman, li ser tarîxa Kurdistanê, gramer, dersên zimanê kurdî, folklor, pîyes û hwd. hatine weşandin. Xizmetên ku KOMKAR`ê li dervayî welat, pêşkêşî ziman û çanda kurdî kirîye, îro êdî bi xurtî xwe digihîne hundurê welat. Îro li hundir û derva bi dehan rojname û kovarên ku bi kurdî derdikevin hene. Di vê pêşketinê da KOMKAR-Swêd jî roleke baş û berbiçav listîye.

KOMKAR-Swêd, ji bo danasandina kurdan û pirsa kurdî, ji bo çêkirina dostan û avakirina lobîya kurdî jî kar û xebatê gelek hêja kirîye. 

KOMKAR-Swêd, li hember zilm û zordestîya dijmin li ser gelê me li Kurdistanê, di nav 30 salan de, bi civîn, meş, konferans, bi grevên birçîtîyê û bi peyvendîyên bi partîyên siyasî û rêxistinên sivîl yê Swêdîya re, bi kar û xebatên lobîyê ve, xwe kir dengê gelê kurd û di vî warî de rolekî taybet lîst.

Komkar-Swêd, ne tenê li dijî dewleta nijadperest ya Tirkîyê, ji bo mafên netewî û demokratîk ya  kurdên bakur kar kirîye. Divî warî de tu ferq û cudatîyê nexist navbeyana kurdan. Car bûye dengê  kurdên rojhilat, car jî ji bo kurdên başûr li ber derê sefareta Iraqê bûye, car jî bûye pişt û pal ji bo kurdên Kurdistana Sûrîye. Îro jî weha ye. Em, li gor aktuelbûn û girîgîya bûyeran xwe ji bo xebatê mobîlîze dikin. Şîara me her tim azadîya Kurdistanê ye. Îjar çi bakur, çi başûr, çi jî rojhhilat dibe, Kurdistan her Kurdistan e.

Li dijî karesata Halebçe û Efal de, Komkarê rolekî pir baş lîst. Di karesata Helebçeyê de, ji bo ku NY pirsa kurd bixe rojeva xwe û pê re elaqeder be, Endam û hogirên Komkarê yekem kes bûn ku palasên xwe li ber derê dayira NY li Stockholmê raxistin.

Di karesata Enfal de, dîsa pêşnîyrê Komkarê bû ku li ber balyozxana Amerîkayê têkevin mangirtina birçîtîyê. Di Komîteya Fonda Helebçeyê de bû endam û di  wî warî da jî erkên xwe anî cîh. Ew Komîteya alîkarîyekî baş berhevkir  û her ew alîkarîya bû ku bi alîkarîya dewleta Swêdê bû bingeha projeya Qendîlê li Kurdistana Başûr.

Mêvanên xoşevît,

Wek hun jî dizanin ku di van mehên dawî de, dewletên cîranên Kurdistanê û bi taybetî jî desthilatdarên Tirkîyê, Di şûna ku rêz û ihtiramê ji bo mafên bingehîn ya 25 milyon Kurdan li Kurdistana Bakûr bigrên û hewilbidin ku bi rêyekî adilane pirsa Kurd çareser bikin, lê ew li dijî Kurdistana Başûr, dijî azadîya gelê me derdikevin, wan bi dagîrkirina Kurdistana Başûr ve tehdît dikin.

Loma jî, Karekî girîn û pêvîst dikeve ser milên komele, rêxistin û dezgehên demokratîk yên Kurdan li Ewrûpayê. Bi taybetî jî Koordînasyona Rêxistinên Demokratîk li Ewrûpayê DEMKURD ku Federasyona Kurd jî yek ji endamên wê yê serekeye, dikarin li seran serê Ewrûpayê bi çalakî û xebatên curbercûr, dost û piştgirin Kurdan li Ewrûpayê ji bo piştgirîya kurdan wan mobilîze bikin.

Rêzdaran,

Min xwest bi kurtî be jî bahsa kar û xebatên Komkarê ji we re bikim. Kar û xebatên baş hêjayî pezindanê ye. Lê divê em kêmanîyên xwe jî bibînin.

Li gor raya min Komkar jî têda dem û dezgehên me yên demokratîk, di warê mijûlbûna bi pirgirêkên civakî de gellek qels bûn û ev qelsîya hîn jî dom dike. Di vî warî de Federasyona Komeleyên Kurdistanê û Yekitîya Jinan hi pirojeyan çê kirin lê berdewamî nebû gellek lawaz bû, karên weha berdewamî dixwaze.

Gellekî tabiîye ku civata kurdan jî li Swêdê pirsên xwe hebin, ji xwe tu civatek tuneye ku  bê pirsgirêk bin. Gava em behsa têkilîyên civakî dikin, beşdarîya şîn û şahîyan, tên bîra me. Elbet beşdarîya şîn û şahîya gellek girîng e.

Lê tiştê ku em ji karê civatê pir diêşîne ew e ku hemû caran piştî ku bûyer diqewimin û zerar tê dîtin, em dest bi minaqeşeyan dikin û piştî demekê jî em wan minaqeşeyan ji bîr dikin.

Mêvanên Ezîz,

Gellek kurd  ji ber sedemên curbecur mecbûr man û hatin Swêdê.Yên ku 20-25 sal berê hatin Swêdê, bi xwe xort bûn, lê îro zarokên wan bûnin 20- 25 salî. Êdî em bûnin beşek ji civata Swêdê, helbet ciwanên me gava li vî welatê mezin dibin, ew ê di bin tesîra civata Swêdê de bimînin. Li vî welatê îmkan û derfetên baş jî, ji bo ciwanan henin, eger meriv bikaribe baş bikar bîne. Ango hay ji ciwanên xwe hebe, bi pirsgirêkên wan ve mijûl bibe, ji ber ku ciwan di hemû civatan de xwedî pirsgirêkên taybetî nin. Bi taybetî jî ciwanên me Kurdan. Eger em bi pirsgirêkên wan ve mijûl nebin û nebin hevalê derdê wan û wan guhdarî nekin, ji bo çareserkirina pirsên wan hewil nedin û wan bê elaqe bihêlin, hingê ewê têkevin valatîyê. Pir caran  di valatîyê de mayina wan, encamê ku em naxawzin û ne li hêvîyêne didin û em ciwanên xwe dikin.

Hevalên hêja,

Îro ne tu plan û programekî li ber rêxistinên me yên demokratîk heye, ne yê ciwanan  bi xwe, ne jî bi gelenperî yên malbatên wan heye. Krimînalîtet û narkotîk di nav xortên kurdan de gellek pêşde çûye. Di van çend salên dawî de  4-5 xotên kurd ji narkotîkê mirin.

Divê, bi taybetî rêxistinên me yên demokratîk û bi giştî jî civata kurd, li ser van pirsa erkên xwe bînin cîh. Divê, civat xwedî li rêxistin û dezgehên xwe yên demokratîk derkevin, piştgirîya wan bikin ku ew jî di karên usa de bikaribin serkevin.

Mêvanên rêzdar,

Di dawîyê de dixwazim bêjim ku ji damezrandinê heta nuha, keda gelek hevalan di nav kar û xebatên Komkarê de heye, îro ji wan hevalan hinek ji ber sebebên cuda di nav me da nebin jî, qeda wan nayê înkarkirin. Loma jî destweşî li hemû kesên ku di kar û xebatên Komkarê de ked û emeg danin dikim.

Ji bo beşdarî û piştgirîya we carek din jî sipasîya we rêzdaran dikim.

Kovan Amedî
Serokê Komeleya Karkerên Kurdistanê
Komkar-Swêd